Коронавирусқа шалдыққан келіншектің баласы жансақтау бөлімінде

Маңғыстау облыстық балалар ауруханасының дәрігерлері церебральды ісінумен жаңа туған нәрестені аман алып қалды.

Бұл туралы Orda.kz хабарлады.

15 қыркүйекте, коронавирустың асқынуына байланысты ауыр жағдайда жатқан әйел жедел түрде босанды.

Әлеуметтік белсенді Азамат Сәрсенбаевтың айтуынша, екінші күні жаңа туылған нәресте өте ауыр жағдайда облыстық балалар ауруханасына ауыстырылды. Оған жедел ми қан айналымының бұзылуы, церебральды ісіну, дислокация синдромы, 2-3 дәрежелі кома диагнозы қойылды.

– Баланы шұғыл түрде хирургиялық емдеуге алып кетті. Операцияны балалар нейрохирургі Ербол Кенжевалов сәтті жүргізді. Осылайша ол жаңа туған қыздың өмірін сақтап қалды, - деді ол.

Бала қазір жансақтау бөлімінде жатыр. Дәрігерлер хирургиялық емдеуден кейін қыздың жағдайы жақсаратынын, оның өміріне ештеңе қауіп төндірмейтінін айтты.

Баланың анасында коронавирус асқынып, желдеткішке қосылды.

Айта кетсек, Денсаулық сақтау министрлігі жүктілікті вакцинаның екі компонентін алғаннан кейін иммунитет толық қалыптасқан соң, яғни, 1,5-2 айдан кейін жоспарлауға шақырады.