Коронавирусқа қарсы вакцинаның кері әсеріне қандай шара бар?

Коронавирусқа қарсы егілген вакцина кері әсер беріп жатса, не істеу керектігі туралы  «Астана медицина университеті» қалалық жұқпалы аурулар орталығының бөлім меңгерушісі Зәуреш Смағұлова кеңес берді, деп жазады ORDA. 

Маман ондай жағдайларға алгоритм қарастырылғанын айтады. 

«Әрине, қандай болса да, вакцина енгізілгеннен кейін кері реакция болуы әбден мүмкін. Ондай жағдай болып тұрады. Нақты алгоритмі де бар. Вакцинациялаумен айналысатын дәрігерлер ол алгоритмді жақсы біледі және көмек көрсете алады», - деді дәрігер ОҚК-де  өткен онлайн-брифингте.

Оның айтуынша, вакцинадан кейін дене қызуы көтеріліп, тұмау көріністері байқалуы, әртүрлі  бөртпелер де пайда болуы мүмкін. 

«Бірінші топ - жалпы реакциялар. Мысалы, дене қызуы, тұмаудың көріністерінің байқалуы. Екінші топ - денедегі нақты өзгерістер. Вакцина енгізілген жердің қызаруы, қышуы мүмкін. Вакцинадан кейінгі әсердің түріне байланысты әртүрлі көмек көрсетіледі. Қызуы көтерілсе, қызуды төмендететін препараттар беру. Вакцина салған жерде  реакция болса, көбінесе ешқандай дәрі-дәрмек тағайындамаймыз. Ол вакцинациядан кейін болатын реакция деп саналады. Ондай әсердің кер көрсеткіші жоқ. Жалпы температурасы жоғарыласа, әрине ондай жағдайларда қабынуға қарсы препараттарды береміз», - деді Смағұлова.

Бұған дейін Денсаулық сақтау министрі Алексей Цой Қазақстанда вакцинация 1 ақпанда басталатынын хабарлағанын естеріңізге саламыз.