Көрнекті мәдениет қайраткері Ғалым Доскен қайтыс болды

«Қазақстан» корпорациясының бұрынғы басшысы филолог, әдебиет сыншысы, режиссер және сценарист Ғалым Доскен 65 жасында дүниеден озды, деп хабарлайды Orda.kz.

Қазақ мәдениеті мен журналистикасының дамуына зор үлес қосқан Ғалым Доскен 1960 жылы 19 шілдеде дүниеге келген. Ол Абай атындағы Қазақ педагогикалық институтын тәмамдаған.

Ол 2001–2002 жылдары «Қазақстанның республикалық теле және радио корпорациясы» басқарма төрағасының бірінші орынбасары, 2002–2006 жылдары «Қазақстан» телерадиокорпорациясы» АҚ басқарма төрағасы, 2007 жылдан бастап «Ел» продюсерлік орталығының көркемдік жетекшісі қызметтерін атқарды.

Қаралы хабар айтқан «Қазақстан» телерадиокорпорациясының бас редакторы Болат Мүрсәлім өзінің парақшасында былай деп жазды:

«Қашан көрсең жайдары, сөйлеп кеткенде арғы мен бергіні, Батыс пен Шығысты сапырып отыратын, қазақтың әнін, күйін, жалпы ұлттық дүниесін түгендеп, соның жоқшысы бола білген Ғалым ағамыз о дүниелік болған екен. Ғалым ағадай биік, Ғалым ағадай парасатты басқа адамды дүниеде кезіктірдім бе, жоқ па, білмеймін. Қабағы түксиіп, күркіреген күндей көрінгенімен, жаны баладай нәзік, досына асық, төңірегіне жиған бауыр-қарындастарына әкедей қамқор жан еді».