Көрнекті ғалым, белгілі публицист Намазалы Омашев 75 жасқа толды

Көрнекті ғалым, белгілі публицист, филология ғылымдарының докторы Намазалы Омашев 75 жасқа толды, деп хабарлайды Orda.kz.

«ҚазҰУ-де профессор Намазалы аға Омашұлының 75 жылдығына орай ұйымдастырылған тағылымды іс-шараға қатысып, мерейтой иесіне Сенат төрағасы Мәулен Сағатханұлы Әшімбаевтың құттықтау хатын тапсырдым» деп жазды Сенат депутаты Дархан Қыдырәлі Facebook парақшасында. 

Алматыда халықаралық ғылыми-тәжірибелік конференция өтіп, жиналғандар Намазалы Омашевтың қазақ журналистикасының өрлеуіне қосқан зор үлесін зор ықыласпен атап өтті.

«Намазалы аға туралы көп айтуға болады. Жампоз жуиналист. Парасатты публицист. Зерделі зерттеуші. Жинап, жүйелеп, журналистиканың жылнамасын жазған ғибратты ғалым. Ұлағатты ұстаз. Бекзат болмыс. Жасай беріңіз, жаза беріңіз жақсы аға!» деп жазды ол. 

Журналистика факультетінің студентерімен кездесу қызықты өтті деп ойлаймын. Дәстүрлі медиа, жаңа медиа, жасанды интеллект, этика және тағы басқа тақырыптарда әңгіме өрбіді, деп қосты Қыдырәлі.

Намазалы Омашев – бес монографияның, алты оқу құралының, бес ғылыми-публицистикалық еңбектер жинағының, жеті оқу құралының және 300-ден астам ғылыми-публицистикалық мақалалардың авторы.