Қорғаныс министрлігі су тасқынында жұмыс істейтін сарбаздар үшін қолғап пен шұлық тапшылығына қатысты жағдайға түсініктеме берді

Orda.kz тілшісінің хабарлауынша, қолғап тапшылығын айтқан сарбаздарға кеше түнде қажеттінің бәрі жеткізілген.

Ведомство өкілдерінің айтуынша, Қарулы күштердің жеке құрамы қажетті құралдармен қамтамасыз етілген. Күн сайын әскери қызметкерлерге тұрмыстық қолғаптар мен антисептиктер беріледі.

«Әскери қызметкерлер заттары тез ластанатын және тозатын қиын жағдайда жұмыс істейді. Әскери қызметкерлердің қажетті құрал-жабдықтармен қамтамасыз етілмеу фактілері анықталса, жергілікті бөлімшелердің командирлері тиісті шаралар қолданады» делінген хабарламада.

Осыған дейін тілшіміз еңбектің арқасында әскери қызметкерлердің қолдары жарылып, сүйелдене бастағанын айтқан болатын. Ал дезинфекциялау құралдарының жоқтығынан жаралары іріңдей бастаған. Антисептиктердің болмауына және көзге шаң түсуіне байланысты конъюнктивит өршиді. Жауынгерлердің айтуынша, командирлері оларға көмек сұрауға тыйым салған.