Қорғаныс министрлігі Ақтөбе облысындағы тікұшақтың құлау себебін мәлімдеді

Қорғаныс министрлігінің мәліметінше, Әуе қорғанысы күштері Әскери институтының апатқа ұшыраған Ми-8 тікұшағы Ақтөбе облысындағы Сарыжар ауылы маңында оқу-жаттығу ұшуын орындап жатқан, деп хабарлайды Orda.kz.

Бортта үш экипаж мүшесі болған, олардың біреуі қайтыс болды, екеуі ауруханаға жеткізілді. Оларға қажетті медициналық көмек көрсетіледі.

«Авиациялық оқиғаның алдын ала себебі - техникалық ақау. Оқиғаның мән-жайы анықталып жатыр», деп хабарлады Қорғаныс министрлігі.

Оқиға орнында ведомствоаралық жедел топ жұмыс істеп жатыр.

«Қарулы Күштер басшылығы мен Әуе қорғанысы күштерінің қолбасшылығы қаза тапқан әскери қызметшінің отбасы мен жақындарына қайғыларына ортақтасып көңіл айтады. Олардың туыстарына, сондай-ақ зардап шеккендерге барлық қажетті көмек көрсетіледі» делінген хабарламада. 

Ақтөбе облысында 9 қараша, сенбі күні жаттығу жұмыстарын атқарып жатқан тікұшақта төтенше жағдай болды. Тікұшақ апаттан кейін өртеніп кетті. Құтқарушылар өртті сөндірді.