Конференцияның бірінші күні: АҚШ пен Еуропа бір-бірін қағытты, Мюнхен таң қалды, Зеленскийдің күткені осы ма еді?

Украина президенті Зеленский келіссөздерге дайын екенін, бірақ аумақтарды беруге келіспейтінін айтты. АҚШ вице-президенті Вэнс Еуропаның «іргелі құндылықтарды жоғалтқанын» айтып, Украина тақырыбы жайына қалды. Еурокомиссия басшысы фон дер Ляйен негізсіз тарифтерге жауап қайтару шаралары қолданылатынын ескертті, деп хабарлайды Orda.kz.

Bloomberg қауіпсіздік жөніндегі Мюнхен конференциясының бірінші күнінің негізгі қорытындыларын шығарды.

• Ресейдің Украинадағы соғысы талқылаудың басты тақырыбына айналды. АҚШ пен Еуропа арасындағы қайшылықтар айқын көрінді. ЕО көшбасшылары мен Трамп әкімшілігінің шенеуніктері бір-бірін сөзбен қағытты.

• Украина президенті Зеленский Киев пен Еуропасыз келісім жасау ақылға қонымсыз болатынын, Трампта «ондай идея жоқ» деп үміттенетінін айтты. Бір күн бұрын ол Ресеймен тікелей келіссөздер жүргізіп, ортақ ұстаным әзірлеу үшін АҚШ бастаған бейбіт бастамаға қатысуға дайын екенін білдірді.

• АҚШ вице-президенті Дж.Д.Вэнс өзінің арандатушылық сөзінде негізгі мәселе – Украина тақырыбын айналып өтіп, оның орнына еуропалық көшбасшыларды демократиялық құндылықтарын жоғалтты деп айыптады.

• Германияның Қорғаныс министрі Борис Писториус Вэнстің мәлімдемелерін қабылдауға болмайтынын айтты.

• Қытай Сыртқы істер министрі Ван И оның елі АҚШ-тың «қорқыту тактикасына» қарсы тұратынын айтып, Еуропаның Украинадағы бейбіт келіссөздерге қатысуын жақтады.

• Еуропалық комиссия төрағасы Урсула фон дер Ляйен де АҚШ-ты сынап, «сауда соғысы мен жазалау тарифтерінің мағынасы жоқ» деп, олай болған күнде жауап қайтару шаралары қолданылатынына уәде берді.

DW Мюнхен «олардың Мәскеу мен Вашингтонның жақындасу қарқынына таң қалғанын» жазды. Басылымның сұхбаттастары президент Трамптың Путинмен келіссөздер басталмай тұрып-ақ, Украинаның НАТО мүшелігінен бас тартуы керек екенін анық айтып, жеңілдік жасағанын қателік деп атады. 

Трамптың көзқарасын сынағандардың қатарында Мюнхен конференциясының басшысы Кристоф Хойсген де бар.

CNN хабарлауынша, Мюнхен қауіпсіздік конференциясына жиналғандар Трамп әкімшілігінің Украинадағы соғысты тоқтату жоспары туралы сөз болатынын күткен, оның орнына Ресей мен Қытайдан келетін қауіп-қатерді төмендету туралы сөз болған.

Le Monde газеті АҚШ вице-президенті Джеймс Вэнстің жұма күні Мюнхенде еуропалықтарға демократия сабағын беруді таңдағанын хабарлады. Оның сөзі Вашингтон мен оның еуропалық одақтастары, әсіресе Германия арасындағы алшақтықты одан әрі кеңейте түсті.

Бұған дейін Мюнхен қауіпсіздік конференциясында жүрген украиндық депутат Алексей Гончаренко АҚШ вице-президентінің сөзін «барлық еуропалық көшбасшыларды қорлау» деп айтуға болатынын айтқан.