Қонаққа келіп, тонап кеткен жігіттің үстінен қылмыстық іс қозғалды

Астанада ер адам 300 мың теңге болатын алтын әшекейлерді ұрлады, деп хабарлайды Orda.kz.

Астана полиция басқармасы мәліметтеріне қарасақ, 20 жастағы жігіт елорда тұрғынына қонаққа келіп, 2 рет ұрлық жасаған. Алғашқысында ол жатын бөлмесіне жасырын кіріп, алтын сақинаны ұрлап кеткен. Қожайындардың алтынның жоғалғанын байқамағанына көз жеткізіп, ол қайта келгенде тағы бір сақинаны алып кетеді.

Үй иесі 300 мың теңгеге жуық зергерлік бұйымдардың жоғалып кеткенін байқағаннан кейін ғана полицияға жүгінді. 

«Жедел-іздестіру іс-шараларының нәтижесінде Сарыарқа аудандық полиция басқармасының қызметкерлері күдіктіні тапты. Ол ақша алу үшін ұрланған сақиналарды ломбардқа тапсырғаны белгілі болды. Полицейлер заттай дәлелдемелер алып, жас жігітке қатысты қылмыстық іс қозғады»,  деп хабарлады полиция.