Қонаевта 14 жастағы оқушы қызды зорлады деген күдікпен екі полиция қызметкері ұсталды

Қылмыстық іс қозғалғаннан кейін күдіктілер келеңсіз себептермен жұмыстан босатылды.

Қонаевта 14 жастағы оқушы қызды зорлады деген күдікпен екі бұрынғы полицей ұсталды, деп хабарлайды Алматы облысы полиция департаментінің баспасөз қызметі.

Бір күн бұрын қоғам белсендісі Дина Смайылова өзінің Telegram-арнасында Қонаев қаласында екі полиция қызметкері қызметтік бабын пайдаланып, 14 жастағы оқушы қызбен жыныстық қатынасқа түсіп, оны бейнежазбаға түсіріп алғанын айтқан болатын. 

Облыстық полиция департаменті күдіктілердің уақытша ұстау изоляторына қамалғанын түсіндірді. Қылмыс жасалған уақытта олар  полиция қатарында қызмет атқарған, бірақ қылмыстық іс қозғалғаннан кейін белгісіз себептермен жұмыстан босатылған.

«7 қарашада полицияға Алматы облысының 43 жастағы тұрғыны арызданып, бұрын белгісіз екі тұлға оның кәмелетке толмаған қызына қатысты сексуалдық сипаттағы зорлық-зомбылық әрекеттерін жасағанын айтқан. Сол күні екі қылмыстық іс тіркелді. Қазақстан Республикасы Қылмыстық кодексінің 120-бабы 3-1-бөлігінің 1-тармағы бойынша – «Кәмелетке толмаған адамды зорлау» бойынша. Полиция қызметкерлері 2000 және 2001 жылы туған күдіктілерді анықтап, ұстады» деп толықтырды полицейлер.

Алдағы уақытта сотқа дейінгі тергеп-тексеру аяқталып, қылмыстық іс материалдары сотқа жіберілетіні атап өтілді.