Композитор Еркеш Шәкеев «Замандас» пен «Курсивті» сотқа берді

Танымал композитор Еркеш Шәкеев өзіне қатысты жалған ақпарат таратып, отбасының беделіне нұқсан келтіргені үшін «Замандас» подкасты мен «Курсив» басылымын сотқа берді, деп хабарлайды Orda.kz.

Еркеш Шәкеев өзінің Facebook парақшасында «Курсив» пен «Замандасқа» қарсы сотқа шағым түсіріп жатқанын айтты. Оның сөзінше, олар композитордың әрекеттерін бұрмалап көрсетіп, абыройын түсіріп, отбасылық беделіне нұсқан келтірген.

«Мені «Замандас» подкастында әртістерге өз әндерін орындауға тыйым салатын және жоғары гонорар талап ететін адам ретінде көрсетті. Бұл — өтірік. Парвиз Назаров пен Карина Абдуллина осы мәлімдемелердің шындыққа жанаспайтынын растады», — деді Шәкеев.

Сондай-ақ, Шәкеев A’Studio тобының мүшелері мен Байғали Серкебаевпен болған қақтығыстар туралы сөздерді де жоққа шығарды. Композитор «Курсив» материалдарының астында оның қызы мен отбасын қорлайтын 200-ден астам  пікір пайда болғанын атап өтті. Ол болып жатқан жағдайды әдейі жасалған ақпараттық шабуыл деп санап, медиа әрекеттеріне құқықтық баға беруге ниетті екенін айтты.

«Менің атым мен беделім — менде бар жалғыз нәрсе. Мен тек шығармашылықпен айналысамын және өмір жолымда адал болуға тырысамын. Ар-намысым мен отбасымды ешкімге таптатпаймын», — деді композитор.

Бұған дейін біз Еркеш Шакеевтің саяси репрессия құрбандарын еске алу күніне жоспарланған концерті ресми түсініктеме берілмей, тоқтатылған жазған едік. Билеттер сатылымы іс-шарадан бірнеше апта бұрын алынып тасталды.