Коммунистік идеология Қазақстанға азап әкелді – депутат

Сенат депутаты Мұхтар Құл-Мұхаммед ресейлік коммунист-депутат Геннадий Зюгановтың мәлімдемесіне жауап берді. Бұған дейін Зюгановтың «Қазақстан билігі орыстілді халықты кемсітеді» деген ақылға қонымсыз айыптауы жарияланған болатын.

Негізінен депутаттың сыны Зюгановқа емес, бүкіл коммунистік партияға бағытталды.

«Коммунистік идея – қазақ халқына жанқиярлық, аяусыз азап әкелген идея. Коммунистік идея бізге қуғын-сүргін, ашаршылық әкелді. Коммунистік идея Қазақстанның ең мықты азаматтары – Алаш қайраткерлерін жойып жіберді, енді 21 ғасырда мұндай коммунистік идеяға орын жоқ. Сондықтан бұны беделінен айырылған аудиториясы азайып, қатарластары қоғамдық пікірге азырақ назар аударып жатқан кездегі арандатушылықтың бірі деп ойлаймын» дейді Құл-Мұхаммед.

Сондай-ақ, ол коронавирусқа байланысты қазір ауыр халде жатқан Либералдық-демократиялық партияның басшысы Владимир Жириновскийге денсаулық тіледі.

«Ресейдің Конституциясында да, заңдарында да Коммунистік партияға орын жоқ. Жириновский де солай айтқан болатын. Естуімше, ол қазір ауыр халде жатыр. Адамға жамандық тілеудің қажеті жоқ. Сауығып кетсін» деді сенат депутаты.

Қазақстан Сыртқы істер министрлігі Ресей Мемлекеттік Думасының депутаты Геннадий Зюгановтың мәлімдемесіне байланысты ресми наразылық білдірмейтінін айтты.

Сыртқы істер министрі Мұхтар Тілеуберді Зюгановтың сөйлеген видеосы Украина мен Ресей арасындағы әскери қақтығыс қызып тұрған кезде интернетте әдейі жарияланған деп болжайды.