Қолсағат Перу президентін түрмеге тоғытуы мүмкін

Перу президенті Дина Болуарте келешекте темір тордың ар жағында қалуға және қызметінен шеттетілуге ұшырауы мүмкін. Себеп - қолындағы қымбат сағат. Оның құны жылдық жалақысынан бірнеше есе жоғары болатын аксессуар тағып алғанын байқаған журналистердің тергеуін көптеген саясаткерлер қолдап отыр.

Парламенттің 25 мүшесі Болуартенің қызметінен шеттетілуін талап етті. Импичмент рәсімі қабылдануы үшін 130 депутаттың 87-сінің дауысы қажет. Қажетті дауыс жиналмауы да мүмкін. Әзірге 54 депутат президентті отставкаға жіберуге ниеті жоқтығын айтқанымен, болашақта ойларын өзгертуі әбден мүмкін.

Перу президенті Дина Болуарте сыбайлас жемқорлыққа қатысты айыптарды жоққа шығарып, қызметтен кетуден бас тартты. Наурыз айында прокуратура мен полиция қызметкерлері мемлекет басшысының резиденциясында тінту жүргізді. Перудің Жоғарғы соты Бас прокурор Хуан Карлос Вильенаның өтініші бойынша тінту жүргізуге рұқсат санкциясын берді. Мұндай әрекеттердің орын алуы Перу басшысының «заңсыз баю» деген күдікке ілінуінде. Жақында БАҚ-та Болуартенің Rolex сағатын таққан фотосуреттері пайда болды. Тінту барысында сағаттың резиденциядан табылғаны жайында хабар жоқ. Бұл Перу тарихында полиция қызметкерлерінің мемлекет президентінің үйіне күштеп кіруі бірінші рет орын алған жағдай.

Мысалы бізде, мемлекеттік қызметте істейтін кейбір адамдар Forbes тізімінде жүреді. Ресми түрде.