Коллекторға несие сатуға толық тыйым салынсын – Қошанов

Мәжіліс спикері Ерлан Қошанов коллекторларға несие сатуға толық тыйым салуды ұсынды.

«Несие беруге қойылатын талаптарды заңнамалық деңгейде күшейту керек. Бұл несиелерді коллекторлық ұйымдарға сатуға толық тыйым салынсын» деді Қошанов халықтың қарыз ауыртпалығы тақырыбына арналған парламенттік тыңдауда сөйлеген сөзінде.

Сондай-ақ, ол дәрменсіз азаматтарға несие беруге тыйым салуды, онлайн несиелендіруді қатаң түрде реттеуді, несие беру шарттарын қайта қарауды ұсынды. Оның пікірінше, жеке тұлғаларға берілетін несиелердің шекті пайызын төмендету маңызды.

Қошановтың айтуынша, халықтың қарыз ауыртпалығы мәселесінде «салдарымен емес, себептерімен күресу керек». Ал бұл заң арқылы ғана мүмкін. Кәмелетке толмаған балалары бар отбасылардың жалғыз баспанасынан айырылып, көшеде қалуына жол бермеу керек. Осының барлығы заң жүзінде бекітілуі керек.