Көлік тасымалдау саласындағы алаяқтар

Көлік және жүк тасымалдау саласындағы алаяқтар құрықталды. Нәтижесінде 6 автокөлік өз иелеріне қайтарылды.

Бұл туралы  Polisia.kz хабарлайды.

Алматы облысы аумағында мессенджерлер мен сайттарды пайдалану арқылы қылмыстық схемамен талай адам сан соқтырған топ бес адамнан тұрады. Қылмыстық топты ІІМ криминалдық полиция департаментінің жедел қызметкерлері құрықтады.

Алаяқтар өздерінің қалыптасқан тәсілі бойынша көлік пен тауар тасымалдау туралы хабарландыруларға хабарласып, тасымалдау қызметін ұсынған. Олар тапсырыс берушілерге өздерін автокөлік жүргізушісі ретінде, ал жүргізушілерге тапсырыс беруші ретінде таныстырып келген. Екі тарапты да алдап, көндіріп, одан әрі қарай заңсыз өткізу мақсатында ұрланған тауарды салып жіберіп отырған.

Осыған байланысты министрлік азаматтарға жүкті жөнелту және қабылдау барысында барлық қажетті құжаттармен мұқият танысуды ұсынады. Хабарландыруда көрсетілген жүргізушінің нөмірін міндетті түрде тексеріп, онымен тасымалдау маршрутын талқылап, жеткізу мекен-жайын анықтап алу қажет.

Ұрланған 6 автокөлік өз иелеріне қайтарылды. Ұсталғандарға қатысты сот қамауға алу санкциясын шығарды.