Көлік нөмірлерін жасырғаны үшін жүргізуші құқықтарынан айырылып, қамауға алынады

Қазақстанда автокөлік нөмірін жасырған адамдар жүргізуші куәлігінен айрылып, қамауға алынады, деп хабарлайды Orda.kz.       

«Астанада жол қозғалысы қауіпсіздігін қамтамасыз ету және құқық бұзушылықтың алдын алу шаралары аясында полиция қызметкерлері жол қозғалысы ережелерін өрескел бұзған жүргізушіні анықтады. Патрульдік полицияның мамандандырылған батальонының қызметкерлері Қабанбай батыр даңғылында «Audi» автокөлігін тоқтатты. Тексеру барысында жүргізушінің мемлекеттік тіркеу нөмірін жасыру мақсатында оны қағазбен жауып қойғаны анықталды. Жүргізушіге қатысты Қазақстан Республикасы Әкімшілік құқық бұзушылық кодексінің 590-бабының 4-бөлігіне сәйкес әкімшілік іс қозғалды. Сот шешімі бойынша құқық бұзушы бір жыл мерзімге көлік құралын басқару құқығынан айырылып, бір тәулікке қамауға алынды» деп хабарлады сенбі күні Астана қаласы ІІД баспасөз қызметі. 

Елордалық полицейлер жол қозғалысы ережелерін сақтаудың маңыздылығын еске салды.

«Жол қозғалысы қауіпсіздігін қамтамасыз ету – әрбір жол пайдаланушының міндеті» деп баса айтты ЖП.