Көлік қыздыруға бес минут жеткілікті - экология министрі

Экология және табиғи ресурстар министрі Ерлан Нысанбаев көлікті бес минуттан артық қыздыруға салынатын айыппұл туралы пікір білдірді, деп хабарлайды Orda.kz.

Үкіметтегі баспасөз мәслихатында ол экология тұрғысынан бұл ережелерді қолдайтынын айтты.

«Солтүстік аймақтар туралы айтатын болсақ, біз бәріміз, көлік жүргізіп жүргендер бес минуттың көлікті қыздыруға жеткілікті екенін білеміз, содан кейін қозғала бастауға болады. Бұл кез келген солтүстік аймаққа қатысты. Сондықтан жағармай үнемдеу тұрғысынан көп адамға қолайлы. Ал экология тұрғысынан біз бұл тәсілді толықтай қолдаймыз»,  деді Ерлан Нысанбаев. 

Журналист министрдің бес минут туралы пікіріне, көптеген астаналықтардың келіспейтінін алға тартты.

«Бүгін мен көлігімді түнде далада қалдырамын — таңертең қарап, өз тәжірибемді өткіземін де, нәтижесін сіздерге айтамын»,  деп уәде берді министр.