«Көктем көрсетеді»: Жаңа министр «тасқынға дайынбыз ба» деген сұраққа жауап берді

Күні кеше Төтенше жағдайлар министрі атанған Шыңғыс Әрінов журналистердің «көктемгі су тасқынына дайынбыз ба?» деген сұрағына жауап берді, деп хабарлайды Orda.kz

Аталған жағдайды алдын ала зерттедім. Жыл соңында, желтоқсанда жаңбыр өте көп жауды. Қар болмады. Сол судың бәрі жерге сіңді. Бәлкім, біздің болжамымыз бойынша, шұғыл тасқын болуы мүмкін. Ақпанның соңында оңтүстік өңірлерде, наурыздың басында солтүстік өңірлерде солай болуы ықтимал, – деп жауап берді Шыңғыс Әрінов.

Әріновтың айтуы бойынша бұл күнде ТЖҚ мамандары оқу-жаттығу жұмыстарын жүргізіп жатыр.

 Сөзбен емес, іспен шаруаны көрсетіп, бәрін практикада жасадық. Қазіргі таңда менің орынбасарым облыс әкімдерінің орынбасарларымен бірге сол оқу-жаттығулардың қорытындысын жасап жатыр. Тиісті жұмыс ары қарай жалғасады. Дайындық жұмыстары, әрекет ету алгоритмі бар. Сол себепті жағдайды көктем көрсетеді, – дейді министр.

ТЖМ мамандарының айтуынша тасқын қауіпі жоғары өңірлерге Ақмола, Ақтөбе, Алматы, Атырау, Батыс Қазақстан, Шығыс Қазақстан, Қарағанды, Қостанай, Солтүстік Қазақстан, Түркістан, Абай, Ұлытау облысы жатады. Тасқын қаупі орташа өңірлер қатарына Жетісу, Жамбыл және Павлодар облысы енгізілген. Ал тасқын қаупі төмен өңірлер – Маңғыстау мен Қызылорда облыстары.