«Көкшетаудағы сыз үйге мәслихат төрағасы келді»: Ол қарт анаға қалай көмектеспек?

Orda.kz Ақмола облысы Қызылжар ауылынан хабарласқан қарт анасымен тұратын жалғызбасты Гүлзира Рамазан жайлы мақала жазған болатын. Көкшетау қалалық мәслихатының төрағасы Әкімов Дастан қасына Қызыл Жар ауылдық округінің әкімі Серікжан Мәкішті ертіп, қарт ананың халін білуге келіпті. 

Бұған дейін қолқаны қапқан этан газ сасыған, көк басып, сыз болған үйде тұратын жалғызбасты Гүлзира Рамазан жайлы жазған болатынбыз.

Бүгін Көкшетау қалалық мәслихаты Гүлзира Рамазанның үйіне барғаны жайлы бейнежазбаны жариялады. Дастан Әкімов пен Серікжан Мәкіш 4 қазан күні қарттар мерекесіне орай сол үйдегі 85 жастағы Сағындық апаның халін білуге барыпты.

85 жасқа келген қарт ана жаз бойы көмір жаққанын, үйдің сыз екенін айтты.

Қарт ананың халін сұрап болып Дастан Әкімов:

«Шешуге тырысамыз. Үй туралы, аула туралы және мына жердің иісі де бар екен. Жақсы, апа. Қараймыз, сөйлесеміз», — деді Дастан Әкімов. 

Дастан Әкімов Қызыл Жар ауылдық округінің әкімі Серікжан Мәкішке көмек көрсетіңдер деп айтып кетті. 

«Ол арыз жазды. Қарастырдық. Фактілердің бәрі хатталды. Ал қыста қарын күреп беру сияқты мәселелерге көмектесеміз», — деді Серікжан Мәкіш. 

Міне содан бері 7 күн өтті. Гүлзира Рамазанға хабарласқанымызда еш өзгеріс жоқ екенін айтты. 

Orda.kz осы мәселені өз назарындп ұстайды.