Көкшетауда жүргізушілерге жедел жәрдемге құрметпен қарауды үйрете бастады

Көкшетауда профилактикалық рейд өтіп жатыр. Оның барысында полиция қызметкерлері жедел жәрдем көліктерімен бірге жүріп, жүргізушілерге жол беруді үйретуде, деп хабарлайды Orda.kz.

Медицина қызметкерлері көп жағдайда жүргізушілердің жедел жәрдемге жол бермейтінін айтып шағымдануда. Мұндай жағдайлар науқастардың көмекті ұзақ күтуіне әкеледі, ал бұл олардың өміріне қауіп төндіруі мүмкін.

«Арнайы көлікке жол бермеген бірнеше жүргізуші анықталып, Қазақстан Республикасының Әкімшілік құқық бұзушылық туралы кодексінің 598-бабы бойынша әкімшілік жауапкершілікке тартылды», — дейді Көкшетау қаласы полиция басқармасының патрульдік полиция батальонының инспекторы Жәнібек Шәкіров. 

Облыстық жедел жәрдем станциясы директорының орынбасары Азамат Қожахметовтің айтуынша, жол бермеген жүргізушілердің әрекеті жиі жол-көлік оқиғаларына себеп болады.

«Өкінішке қарай, қазіргі таңда арнайы техникаға жол бермейтін жүргізушілермен жиі кездесеміз. Кейбірі жедел жәрдемнің дабылын естімейді, енді біреулері мүлде көрмейді. Мұның салдарынан жол апаттары болады, ал кейін біздің жедел жәрдем жүргізушілерін кінәлайды», — деді Қожахметов.