Көкшетауда үйлену тойы күні күйеу жігітті өлтірген адамға сот үкімі шықты

Көкшетауда қанды оқиғаға қатысты сот үкімі шықты. 22 жастағы Диас Сәкеновті үйлену тойы күні өлтірген ер адам сотталды, деп хабарлайды Orda.kz.

Оқиға 12 қарашада болған. Диас Сәкенов үйлену тойын өткізіп  жатқан. Сол жерде тек оның қонақтары ғана емес, басқа адамдар да болған. Кикілжің осы бөгде топпен туындап, айыпталушы Б. марқұмға үш рет пышақ сұққан. Бір пышақ жүрек тұсына тиген. Жедел жәрдем жетіп үлгермей Диас оқиға орнында көз жұмған.

Қылмыстық істер жөніндегі мамандандырылған ауданаралық сот айыпталушының әрекетін бұзақылық ниетпен жасалған кісі өлтіру деп таныды. Оның кінәсі куәгерлердің айғақтарымен, бейнебақылау жазбаларымен және сараптама қорытындыларымен дәлелденді. Қылмыс мас кезде жасалған.

Сот айыпталушыны 16 жылға бас бостандығынан айырды. Сонымен қатар, сот марқұмның отбасы пайдасына 10 миллион теңге көлемінде моральдық өтемақы төлеуді міндеттеді. Үкім әлі заңды күшіне енген жоқ.