Көкшетауда көпбалалы отбасының балалары балабақшадағы тегін тамақтан қағылды

Көкшетау қаласында бірқатар көпбалалы отбасының балалары енді балабақшада тегін тамақ іше алмайды, деп хабарлайды Orda.kz.

Президенттің жаңа Жолдауы аясында әлеуметтік көмек тек нақты мұқтаж жандарға ғана көрсетілуі тиіс. Сондықтан да көпбалалы болу — жеңілдік алуға негіз болмайды. 

«Бұрын барлық көпбалалы отбасы ешқандай шектеусіз тегін тамақтануға құқылы болатын. Енді бұл жеңілдік өзгерді. Мысалы, жеті баласы бар, алайда әкелері ірі кәсіпорынды басқаратын отбасы бұрын бұл қызметті пайдаланды. Енді олар балабақшадағы тамақты өз қаражаты есебінен төлейді, олардан жеңілдік алынып тасталды», — деп түсіндірді Ақмола облысы әкімінің орынбасары Алтынай Әмренова.

Оның айтуынша, енді тек атаулы әлеуметтік көмек алатын және жан басына шаққандағы табысы күнкөріс минимумынан төмен отбасылардың балалары ғана тегін тамақтану құқығына ие болады.

Еске сала кетейік, парламент палаталарының бірлескен отырысы басталды. Мемлекет басшысы әлеуметтік төлемдерді біріздендіру керегін айтты.