Көкшетауда басшысының мәйітін көлігінде сақтаған қызметкер ұсталды

Көкшетауда 41 жастағы Жанболат Кенжахметовтің денесі көліктің жүксалғышынан табылды, деп хабарлайды Orda.kz.

Жанболат 8 мамырда жоғалып, он күннен кейін өлі табылған. Марқұмның туыстарының айтуынша, ол жұмыс орнында өзінен кіші, 23 жастағы қол астындағы қызметкерімен жиі сөзге  келіп жүрген.

«Бәрін алдын ала жоспарлапты. Ыңғайлы сәтті күткен, бірнеше ай бойы соны ойлап жүрген. Жалғыз әрекет етпеген. Өзі ойынға әуес еді», — дейді марқұмның анасы Халида Игелдиева.

Тергеу деректеріне қарасақ, 8 мамырда, сағат 15:00 шамасында Жанболат әріптесінің көлігіне отырған. Көлік жүргізушісі оны қала шетіндегі гараж жаққа алып кеткен. Бұл сәт бейнебақылау камераларына түсіп қалған. Тергеушілердің болжамынша қылмыс сол жерде жасалған.

Жанболаттың жоғалғаны туралы полицияға 11 мамырда хабарланған. Әкесі баласының жұмыстан кейін әріптесімен бірге автоқалашық жаққа кеткенін, содан бері хабарсыз екенін айтқан.

Полиция жедел іздестіру жұмыстарын бастап, куәгерлерден жауап алып, қонақ үйлер мен жалдамалы пәтерлерді, бос қалған ғимараттарды тексеріп, бейнебақылау жазбаларын саралаған. Осы жұмыстардың нәтижесінде марқұмның қайда болғаны мен өліміне байланысты жайттар анықталды. Күдікті ұсталды. Тергеу жүріп жатыр.

Еске сала кетейік, Ұлытау облысында тұрғын үйдің кіреберісінде қызға шабуылдаған ер адам оқиғаның мән-жайын айтып берді.