Көкшетауда ақ кимешекті аналар шеруі рекорд орнатты

Көкшетауда ақ кимешек киген аналар шеруі бойынша рекорд жасалды, деп хабарлайды Orda.kz.

Наурыз мейрамында дәстүрге құрмет әрі өз тарихын мақтаныш етудің белгісі ретінде қала көшелеріне әртүрлі жастағы және әртүрлі мамандық иелері 1600 әйел кимешек киіп шықты. 

Осылайша Ақмола облысының аналары Қазақстан Президенті Қасым-Жомарт Тоқаевтың ұлттық киім кию арқылы этникалық бірегейлікті нығайту туралы бастамасын қолдады.

«Ұлттық киім кию бірте-бірте үйреншікті жағдайға айналып барады. Бұл өте жақсы үрдіс. Бетін жасырып, қара жамылғаннан гөрі, ұлттық нақыштағы киімдерді киген әлдеқайда жарасымды. Оның үстіне ұлттық киім табиғи өте үйлесімді әрі керемет көрінеді. Біздің ұлттық киімдерімізде этникалық бірегейлікті айқын көрсетеді, сондықтан оны жан-жақты насихаттау керек», - деді Тоқаев биылғы Ұлттық құрылтайда.

Ауқымды шеруді қала тұрғындарының барлығы дерлік тамашалады. Ал шерудің ұзындығы бір шақырымнан асты. Сонымен қатар, бас сахнаның LED экранынан әдемі шеру тікелей эфир арқылы көрсетілді.

«Ақ кимешек – бейбітшіліктің, жақсылықтың символы. Бүгінгі шеруге көп балалы әйелдер де, 90 жастағы әжелер де қатысты. Бұл Көкшетау қаласы әкімдігінің қолдауымен Ақмола облысы Аналар кеңесінің бастамасы екенін атап өткім келеді. Бұл шараға екі жүзден астам көп балалы ана қатысты», - дейді «Асыл аналар» қоғамдық бірлестігінің төрайымы Анаргүл Мұхамедрахимова.

Шеру Қазақстанның Гиннес рекордтар кітабына енді. Оған облыстың дамуына сүбелі үлес қосқан әйелдер жетекшілік етті. Олардың қатарында Қазақстанның еңбек сіңірген мәдениет қайраткерлері, ұстаздар, қоғам қайраткерлері мен көп балалы аналар бар.