Қоянқұста ата-аналар балаларын мектепке жібере алмай отыр

Алматы облысы Қоянқұс ықшам ауданында ата-аналар жиналып, әкімдікке наразылығын білдірді, деп хабарлайды Orda.kz.

Тұрғындардың айтуынша, 6 қазан күні оқушыларды мектепке тасымалдауға арналған жаңа автобус берілуі тиіс болған. Алайда таңғы ауысымда оқитын балалар көлік болмағандықтан мектепке бара алмай, ата-аналар әкімдікке шағымданды.

«Бір апта бұрын «келесі дүйсенбіде, яғни бүгін автобус беріледі, оқушылар тасымалдаусыз қалмайды» деп уәде берген. Бірақ бүгін балалар 30–40 минут күтіп, үйлеріне қайтуға мәжбүр болды», – деді тұрғындар.

Осы мәселеге байланысты Orda.kz тілшісі Алматы облысының білім басқармасына хабарласты.

«Алатау қаласының білім бөлімі Қоянқұс ықшам ауданындағы №14 орта мектептің 244 оқушысын 2025–2026 оқу жылында тасымалдауды қамтамасыз ету мақсатында қажетті шаралар қабылдады. 1 қазаннан бастап автобус техникалық ақауға байланысты уақытша істен шықты, қазір білім бөлімі жедел жөндеу жұмыстарын жүргізіп жатыр»,  деп мәлімдеді ведомство.

Алатау қалалық әкімдігінің баспасөз хатшысы ертеңнен бастап тасымалдау қайта жанданатынын хабарлады.

Еске сала кетейік, бұған дейін Қоянқұс тұрғындары ықшам аудандағы жағымсыз иіске шағымданып, әкімдікке наразылығын жеткізген болатын. Orda.kz тілшісі ол кезде де оқиға орнында болып, тұрғындардың пікірін тыңдаған еді.