Қояндыда қордаланған мәселе көп

Қояндыда қордаланған мәселелердің шешімін табу үшін Бас прокурор Берік Асылов нұсқау берді.

Бұл туралы Ақмола облысының прокуратурасы хабарлады.

Қоянды ауылының тұрғындары, мүлікке құқықтарды рәсімдеуге байланысты құжат алу үшін Астана, Көкшетау қалаларына қатынауға мәжбүр болатын. Бұл халыққа қызмет көрсету орталықтарының қашықтығына байланысты азаматтардың наразылығын тудырды. Сол себепті тұрғындар ұзақ уақыт құжаттарын тіркемеген. Ал бұл соңғы су тасқыны кезінде апаттан келтірілген залал үшін өтемақы алуға келгенде мәселеге айналып отыр. Сондықтан 2000-ға жуық үйде әлі күнге дейін құқық белгілейтін құжат жоқ. 

Осы орайда облыс прокуратурасы облыс әкімдігімен бірлесіп Қоянды ауылының №2 жалпы білім беретін мектебіне «бір терезе» қызметін орналастырды. Ол жерде жылжымайтын мүлік құқықтарын жедел тіркеу үшін «Азаматтарға арналған үкімет» қызметкерлері көмектеседі.

Сонымен қатар облыс прокурорлары Ақмола облысының аудан орталықтары мен шалғай ауылдарына да барып қызмет көрсетуде. Азаматтарды толғандыратын мәселелер анықталып, оларды шешу бойынша шаралар қабылдануда.