Көзіне шөп салғаны үшін өлтірілді: Петропавлда полицейдің әйелі сотталды

Күйеуін өлтірді деген күдікке ілінген Айгүл Жұмағали соттың үкімімен кінәлі деп танылып, сегіз жылға бас бостандығынан айырылды. Ол жазасын орташа режимдегі түзеу мекемесінде өтейді.

Күйеуінің опасыздығынан туындаған жанжал негізінде отбасылық трагедия 2022 жылдың 25 мамырына қараған түні болды. Әйел мас күйінде 32 жастағы күйеуінің кеуде тұсынан пышақ сұққан. Дархан Жұмағали алған жарақатынан сол жерде көз жұмды, деп хабарлайды Petropavlovsk.news.

Айгүл мен Дарханның екі баласы бар. Марқұм бес жыл бойы полиция қызметкері болып жұмыс істеген. Сотталушының кінәсі куәлардың айғақтарымен, оқиға болған жерді қарау хаттамасымен және сараптамалық қорытындылармен анықталды.

Прокурор Айгүл Жұмағалиды сегіз жылға бас бостандығынан айыруды сұрады. Әйел жазасын колонияда өтеумен қатар, жәбірленушілердің пайдасына төрт миллион теңге көлемінде моральдық шығынды өтеуі тиіс. Жәбірленуші жаза мөлшері туралы шешімді соттың қарауына қалдырды. Қорғаушы тарап жазаны Қылмыстық кодекстің 99-бабының 1-бөлігінің санкциясында көзделген шектен төмен жеңілдетуді сұрады.

Сот қылмыстық жауаптылықты жеңілдететін мән-жайлардың болуын - шын жүректен өкінуін, екі жас баласының болуын, өлтірілген адамның мінез-құлқының азғындық және құқыққа қарсылығы қылмыс жасауға негіз болғанын ескерді.

Үкім заңды күшіне енген жоқ.