Көлік жуушы  Lexus көлігін ұрлап, Алматыда серуендемекші болған

Өзбекстанның 28 жастағы азаматы мас күйінде көлік жуу орнынан Lexus LX 570 көлігін ұрлап, содан кейін ол мегаполисті аралауға бел буған, деп хабарлайды Polisia.kz .

— Ол қаланы білмей, зиратқа кіріп кетіп, басқаруды жоғалтып, бейіт қоршауларын бұзды. Бақытымызға орай, ешкім зардап шеккен жоқ, қабірлер де зақымдалған жоқ. Мұны зират күзетшісі байқап, оқиға туралы дереу полицияға хабарлаған. Бірінші болып әрекет еткен учаскелік инспекторлары қоғамдық тәртіпті бұзған адам қашып кетпек болған кезде дереу ұстады. Белгілі болғандай, көлік иесі жол талғамайтын көлігінің бамперін бояу үшін техникалық қызмет көрсету станциясына қалдырған, сырлаушылар көлікті жууға шешім қабылдап, жақын маңдағы көлік жуу орнына айдап кеткен. Сол жерден әлгі адам көліктің кілтін иеленген, - дейді Алатау аудандық полиция бөлімінің бастығы Ілияс Өмірсеріков.

Аталған факті бойынша ҚР Қылмыстық кодексінің 200-бабы «Автокөлікті немесе өзге де көлік құралын заңсыз иелену» бойынша сотқа дейінгі тергеу басталды. Сонымен қатар, ҚР ӘҚБтК-нің 608-бабының 6-бөлігі «Жүргізушінің көлік құралын алкогольдік, есірткілік немесе уытқұмарлық масаң күйде басқаруы» бойынша әкімшілік іс материалдары жиналды.