Көкшетау тұрғыны жәбірленушіні қорқытып,  тауарлық және ақшалай несие алғызған

Жәбірленушіге бір жарым миллион теңгеден астам материалдық шығын келтірілген, деп хабарлайды Orda.kz

Ақмола облысы ІІД Ұйымдасқан қылмысқа қарсы күрес басқармасының қызметкерлері Көкшетау қаласының тұрғынын ұстады. Құқық қорғау органдарының мәліметінше, ол бірнеше рет жергілікті тұрғынды қорқытып, зорлық-зомбылық көрсетіп, тауарлық және ақшалай несие алуға мәжбүрлеген. Нәтижесінде жәбірленушіге бір жарым миллион теңгеден астам материалдық шығын келтірілген.

«Бұл дерек Қазақстан Республикасы Қылмыстық кодексінің 194-бабының 2-бөлігі («Зорлық-зомбылық арқылы бопсалау») бойынша Сотқа дейінгі тергеп-тексерудің бірыңғай тізіліміне тіркелді. Істің басқа да мән-жайлары анықталуда. Бұл баптың санкциясы үш жылдан жеті жылға дейінгі мерзімге бас бостандығынан айыру түріндегі жазаны қарастырады. Күдікті қамауға алынып, уақытша ұстау изоляторына қамалды. Тергеу амалдары жүргізілуде», - деді облыстық полиция департаменті.