ҚМДБ сурет салуға қатысты шариғат бойынша пәтуа шығарды

ҚМДБ ғұламалар кеңесі сурет салуға қатысты пәтуа шығарды, деп хабарлайды Orda.kz.

Қазақстан діни мұсылмандар басқармасының мәліметінше, шариғатта  тірі жанның суретін салуға тыйым салынған.

Ғалымдар сурет салудың үкімін екіге бөліп қарастырады:
1. Жансыз заттардың суретін салу рұқсат етіледі. Төрт мәзһабтың (ханафи, мәлики, шафиғи, ханбали) ғалымдары жансыз нәрселердің суретін салуға рұқсат етілгендігіне бірауыздан келіскен. 
2. Тірі жанның суретін салу. Бұл – ғұламалар арасында тартысты мәселе. Жұмһур (ханафи, шафиғи, ханбали) ғалымдары тірі жанның толық бейнесін салуға тыйым салған.

Мәлики мәзһабының және заманымыздың көптеген ғалымдары көлеңкесі жоқ жаны бар нәрселердің суреттерін салуға рұқсат береді.  Ал сурет салуға тыйым салынған хадистерді көлеңкесі бар суреттерге қатысты келген деп түсіндіреді.
Десе де ғалымдар сурет салуға тыйым салынған хадистердің құрамына жаны бар нәрсенің бейнесіндегі ойыншықтардың суретін салуға рұқсат берген. Себебі оның баланың жақсы өсіп, қалыптасуына және бала тәрбиесіне пайдасы мол.  

ҚМБД шығарған нақты шешімге тоқталар болсақ:

• Жансыз заттың суретін салуға рұқсат етіледі.
• Білім беруде, ғылыми мақсатта жаны бар нәрсенің суретін салуға болады.
• Тәрбиелік мәні бар, шариғат қағидаттарына қайшы келмейтін мултьфильмдерді шығаруға болады.
• Пайғамбарлардың бейнесін бейнелеу – харам.