ҚМДБ қалың мал мен мәһірге қатысты мәлімдеме жасады

ҚМДБ мәһір мен қалыңмалды біріктірді. Қазақстан мұсылмандар діни басқармасы қалың мал мен мәһірге қатысты мәлімдеме жасады, деп хабарлайды Orda.kz Aikyn.kz-ке сілтеме жасап.

Мүфтияттың баспасөз қызметінің мәліметінше, «әке еңбегі», «ана сүті» сияқты қыздың әке-шешесіне, туыстарына берілетін мал-мүлік мәһірге саналмайды. Сондай-ақ, қыздың жасауын әкесі өз мүлкінен алып берсе, бұл мәһір болып есептелмейді.

«Қазақ дәстүрінде қалыңмал – қалыңдық үшін берілетін мал-дүние. Егер екі жас ажырасқан жағдайда қалыңдық малы қыздың иелігінде қалатын болған. Осы тұрғыдан қалыңмалды мәһір деп санауға болады», — делінген ресми ақпаратта.

Осы ретте ҚМДБ баспасөз қызметі мүфтият шешімін жария етті.

«Шешім: Күйеуі тарапынан берілетін қалыңмалды қыздың разылығымен мәһірге жатқызуға және артынан алып баратын жасауына пайдалануға болады. «Әке еңбегі», «ана сүті» секілді қыздың әке-шешесіне, туыстарына берілетін мал-мүлік (кәдесый, т.б.) мәһірге жатпайды» делінген ақпаратта. 

Қалыңмал берілмейтін өлкелерде неке қию барысында мәһір белгілеуі тиіс. Мәһір белгіленбеген жағдайда некесі дұрыс болады. Бірақ күйеуі мәһір-мисл береді.

Мәһір-мисл деген — қыздың әке жағынан туыстары арасында өзіне тең келер әйелдерге берілетін сыйлық.