Клубта атыс шығарған полиция подполковнигі шенінен айырылды

Павлодар сотында бильярд клубының тұрағында газ тапаншасынан оқ атқан полиция подполковнигіне қатысты қылмыстық іс бойынша үкім шықты. Полицейдің бас бостандығы шектеліп, арнайы шенінен айырылды.

Павлодар қалалық №2 сотының баспасөз қызметі хабарлағандай, 6 наурызда сот ІІД Қылмыстық іздестіру басқармасының оқу орталығының кадр саясаты бөлімінің бастығына қатысты бұзақылық  қылмыстық іс бойынша үкім шығарды.  2023 жылдың қаңтарында сотталушы Павлодар қаласының Сұрағанов көшесіндегі бильярд клубының алдындағы көлік тұрағында оқ атқан. Полиция қызметкері екі адаммен жанжалдасып, оларды қорқыту үшін жарқылы мен газ патрондары бар газ тапаншасынан  бірнеше рет оқ атқан. Полиция подполковнигінің қарсыластары шегінді, осы кезде ол тұрақтан шығып кетті.

Сот полиция қызметкерінің жасаған қылмысы ауыр қылмыс санатына жатқызылғанын атап өтті. Подполковниктің кінәсі куәлар мен жәбірленушілердің айғақтарымен, сараптамалық деректермен расталды.

Сот полиция қызметкерін кінәлі деп танып, жауаптылықты жеңілдететін және ауырлататын мән-жайларды ескере отырып, үш жыл мерзімге бас бостандығын шектеу жазасын тағайындады. Сондай-ақ ол полиция подполковнигі шенінен айырылды. Үкім әлі заңды күшіне енген жоқ.