Кішкентай баланы өлімнен аман алып қалған 17 жастағы Дәуітбековтің отбасына пәтер беріледі

Терезеден құлаған қызды аман алып қалған 17 жастағы Есдәулет Дәуітбековке Нұр-Сұлтанда үш бөлмелі пәтер сыйға беріледі. Ол отбасымен бірге тұрғылықты жері мен тұрғын үйді өзі таңдайды.

Есдәулет бүгін анасы Әсемгүл Қабдықалықовамен бірге Білім министрі Асхат Аймағамбетовпен кездесті.

Министр түлекке алғысын білдіріп, Есдәулеттің жеке қасиеттерін еліміздің барлық оқушыларға үлгі етті. Сондай-ақ, Аймағамбетов жас жігітті алғыс хатпен, естелік сыйлықтармен және Алматыдағы Нархоз университетінде тегін оқуға мүмкіндік беретін грантпен марапаттады. Грант министрдің жеке өтініші бойынша берілді.

Еске салсақ, осыдан екі күн бұрын ол Нұр-Сұлтанда терезеден құлап бара жатқан екі жасар баланы аман алып қалды.

13 шілдеде «Шерқала» тұрғын үй кешенінде екі жасар бала жетінші қабаттағы терезеден құлап кете жаздады. Бүлдіршіннің ата-анасы сол сәтте үйде болмаған. Көмекке келгендер бір сағаттай пәтерге кіре алмады.

Сәбиді құтқаруға 17 жастағы Есдәулет Дәуітбеков өз еркімен ұмтылған. Жас жігіт жабық пәтерге көтерілген. Жігіт кейін Экспресс K басылымына пәтерде 1 жастан 3 жасқа дейінгі тағы екі сәби болғанын айтқан. Аналары дүкенге кеткен. Есдәулет оны күтіп, балалардың қауіпсіздігіне көз жеткізгеннен кейін ғана оқиға орнынан кеткен.