«Кінәсізбін!»: Арыстанбек Мұхамедиұлы түрмеде аштық жариялады

Қазақстанның бұрынғы мәдениет және спорт министрі Арыстанбек Мұхамедиұлы соттың 11 жылға бас бостандығынан айырғанына наразы екенін білдіріп, аштық жариялады, деп хабарлайды Orda.kz.

Бұл туралы оның Facebook парақшасында жарияланған жазбада айтылған.

«Мен аштық жариялаймын. Өйткені өзімді әу бастан-ақ кінәсіз деп санадым!» – деп жазылған экс-министрдің атынан жазылған мәлімдемеде. 

Мұхамедиұлы «Дипломат» қонақүйін рейдерлік жолмен тартып алу және «Алтын адамның әлем музейлеріне шеруі» көрмесін ұйымдастыру кезінде қаржы жымқыру ісі бойынша кінәлі деп танылған. Алайда ол сот процесінде заң бұзушылықтар болғанын айтып, өзінің ісін қайта қарауды талап етіп, президент әкімшілігіне хат жолдаған.

Orda.kz оның  хатын жариялаған болатын.

Қазіргі уақытта оның әлеуметтік желідегі парақшасын өзі жүргізіп отырғаны немесе өкілдері арқылы жарияланып жатқаны белгісіз. Бірақ Арыстанбек Мұхамедиұлының атынан жазған хатты салыпты.

Orda.kz қылмыстық-атқару жүйесіне осы мәселе бойынша ресми түсініктеме сұрап, сауал жолдады. Бұрынғы мәдениет министрінің аштық жариялағаны туралы ақпаратқа ҚАЖК түсініктеме берді.

Қылмыстық-атқару жүйесі комитеті (ҚАЖК) бұл ақпараттың шындыққа жанаспайтынын мәлімдеді.

«Ол тамақ ішіп жүр, бұл бейнебақылау камераларының жазбаларымен расталған. Қазіргі уақытқа дейін оның тарапынан ешқандай шағым түскен жоқ. Сонымен қатар, қолданыстағы тәртіпке сәйкес, сотталған азаматтың ұялы телефон қолдануына рұқсат берілмеген», – деп хабарлады Ақмола облысы бойынша Қылмыстық-атқару жүйесі департаменті.

ҚАЖК өкілдері Мухамедиұлының әлеуметтік желідегі парақшасында аштық туралы жазба қалай жарияланғанын тексеретіндерін мәлімдеді.