Үкімет утиль алым мөлшерлемесін төмендетіп, газ бағасын екі жыл көтермейтініне уәде берді

Қазақстан үкіметі утиль алым ақысын төмендетіп, газ бағасын екі жыл қымбаттатпаймыз деп уәде берді.

«Ластандырушы заттардың шығарындыларын азайтуға, қалдықтарды және су ресурстарын басқару жүйесін жақсартуға, көлдерді қалпына келтіруге бағытталған шараларды жүзеге асыру жалғасады. Көлік құралдары мен ауылшаруашылық техникасын утиль алымының мөлшерлемесі оларды айтарлықтай төмендету бағытында қайта қаралып жатыр» деді премьер-министр Әлихан Смайылов үкімет отырысында.

Оның айтуынша, сарқынды суларды төгу көлемін, технологиялық қажеттіліктерге тұщы суды тұтынуды, өздігінен пайда болатын үйінділер санын азайту шаралары да жүзеге асырылады.

«Мемлекеттік басқаруды жаңғырту шеңберінде мемлекеттік органдардың ақпараттық жүйелерінің қайталануын жою және оларды толық интеграциялау мақсатында бірыңғай IT платформаға көшу қамтамасыз етіледі. Мемлекеттік органдардағы процестер мен рәсімдердің реинжинирингі жүзеге асырылады» деп қосты премьер-министр.

Ол үкімет инфляцияны бақылау және төмендету, тарифтік саясатты жетілдіру, қаржылық тәртіп пен ашықтықты қамтамасыз ету бойынша кешенді шараларды жүзеге асыруға баса назар аударатынына уәде берді.

«Ішкі нарық қосымша 150 мың тонна сұйытылған мұнай газымен қамтамасыз етіледі. Шикізат пен тауарлық газдың бағасы 2024 жылдың 1 қаңтарына дейін өткен жылдың желтоқсанындағы деңгейде бекітіледі» деп сендірді Смайылов.