Үкімет шетелге кеткен капиталды елге қалай қайтаратынын мәлімдеді

ҚР премьер-министрі Әлихан Смайылов елден шетелге кеткен капиталды қайтару және қаражаттың кетуіне қарсы тұруға бағытталған шараларды күшейту туралы ұсыныстарды талқылаған кеңес өткізді.

Осылайша, Смайыловтың өкімімен Комиссия құрылып, оның аясында бес жұмыс тобы құрылды. Бұл жұмыс топтары қаржының сыртқа шығуын талдап, елге шетелден капиталды қайтаруды ынталандыру бойынша тиісті ұсыныстар әзірлейді, шектеу шараларын енгізеді, шығарылған капиталды қайтару шараларын қабылдайды.

Қаржы министрлігінің Мемлекеттік кірістер комитетіне валюталық бақылаудың жекелеген функцияларын беру жөніндегі ұсыныстар талқыланды. Ынталандыру шараларының бірі алынған валюталық түсімдерді 80% айырбастау шартымен қайтаруға мәлімделген ҚҚС сомасын оңайлатылған қайтаруды ұсыну болып табылады.

Сондай-ақ, резидент еместерге дивидендтер төлеу бойынша салықтық жеңілдіктерді жою, байланысты резидент емес тұлғалар көрсететін материалдық емес қызметтер үшін шегерімдерге шектеу енгізу сияқты шектеу шараларын ұсынады.

Қазақстанның «Трансферттік баға белгілеу туралы» заңын жетілдіруге бағытталған нормалар әзірленді.

Сонымен қатар, елге капиталды қайтаруды ынталандыру, елден капиталды шығаруды салықтық әкімшілендіруді күшейту бойынша басқа да шаралар әзірленуде.

Комиссия жұмысының қорытындысы бойынша президентке тиісті ұсыныстар жолданатын болады.

Еске салсақ, 2 ақпанда «Ақ жол» демократиялық партиясының өкілдері қаңтардағы қайғылы оқиға кезінде Қазақстаннан шет елдерге ірі көлемде қаржы аударылғаны туралы ақпаратты талап етті.

Кейін президент Қасым-Жомарт Тоқаевқа биыл тоқтатылған күдікті транзакциялар саны үш есеге артқанын, олардың жалпы сомасы шамамен 150 миллиард теңгені құрағанын хабарланды.