Үкімет негізгі өнімдер бағасының «нөлдік өсімі» туралы мәлімдеді

Премьер-министр Асқар Мамин әлеуметтік маңызы бар азық-түлік тауарлары (ӘМАТ) бағаларын реттеу мәселелері бойынша кеңес өткізді. 

Үкіметтің Цифрлық кеңсесінде өткен жиынға орталық мемлекеттік органдары басшылары мен өңір әкімдері қатысты, деп primeminister.kz хабарлады. 

Қазіргі жағдай мен жүргізіліп жатқан жұмыс туралы Сауда және интеграция вице-министрі Ержан Қазанбаев, Ауыл шаруашылығы министрі Ербол Қарашөкеев, Бәсекелестікті қорғау және дамыту агенттігінің төрағасы Серік Жұманғарин, Алматы қаласының әкімі Бақытжан Сағынтаев, Шымкент қаласының әкімі Мұрат Әйтенов, Түркістан облысының әкімі Өмірзақ Шөкеев, Алматы облысының әкімі Амандық Баталов және басқалары сөз алды. 

Өткен аптада Қазақстанда әлеуметтік маңызы бар азық-түлік тауарлары бағасының жалпы өсу индексі 0,0% болды. Қабылданған шаралар есебінен екінші апта қатарынан картоп (-0,4%), пияз    (-1,3%) және сәбіз (-2%) бағасының төмендеуі байқалды. Бір апта ішінде қырыққабат бағасының өсу қарқыны 0,1%-ға дейін төмендеген.

Өңірлерде «айналым схемасын» қаржыландыру 47,9 млрд теңгеге жетті. Нысаналы деңгей 95,7%-ға қамтамасыз етілді. «Айналым схемасы» бойынша тиімді жұмыс Нұр-Сұлтан, Алматы және Шымкент қалаларында, Алматы, Шығыс Қазақстан, Батыс Қазақстан, Қостанай, Солтүстік Қазақстан және Түркістан облыстарында жүргізілді.

Өткен аптада Бәсекелестікті қорғау және дамыту агенттігі баға белгілеуде сөз байласқан іс-әрекеттері бойынша Ақмола, Павлодар, Солтүстік Қазақстан және Қарағанды облыстарында тауық жұмыртқасын өткізетін 7 құс фабрикасына қатысты тергеу бастады. Тауық жұмыртқасы, құс еті және қант нарығы субъектілеріне бағалық сөз байласу белгілері мен түрлі бағалар қолдануына қатысты 12 хабарлама жіберілді. Шығыс Қазақстан облысының көтерме жеткізушісімен монополияға қарсы комплаенстің 1 актісі жасалды. 

Жалпы, республика бойынша өндірушілер, көтерме жеткізушілер мен сауда желілерімен монополияға қарсы комплаенстің 140 актісі жасалды. Премьер-министр орталық мемлекеттік және жергілікті атқарушы органдарға әлеуметтік маңызы бар азық-түлік өнімдерінің бағасын тұрақтандыру және төмендету, сондай-ақ инфляцияның жалпы деңгейін 8,5% шегінде ұстап тұру бойынша жұмысты жалғастыруды тапсырды. Өңірлер әкімдіктеріне «айналым схемасы» бойынша қаржыландыруды ұсынылған көлемге жеткізу, азық-түлік бойынша бес айлық қорды қамтамасыз ету, сауда желілері мен өндірушілер арасында форвардтық келісімшартты уақтылы ұйымдастыру тапсырылды.