Үкімет депутаттардың, министрлердің және әкімдердің жалақысын көтеруге тыйым салды

11 қаңтарда президент Қасым-Жомарт Тоқаев министрлер, депутаттар мен әкімдердің жалақысын көтеруге бес жылға мораторий жариялады. Үкімет тиісті қаулы қабылдады.

Қазақстан үкіметі сейсенбі, 1 ақпанда депутаттардың, министрлердің және әкімдердің жалақысын арттыруға мораторий енгізу туралы қаулы қабылдады.

«Мемлекет басшысы Қасым-Жомарт Тоқаевтың тапсырмасын орындау шеңберінде «Парламент депутаттарының, үкімет мүшелерінің және барлық деңгейдегі әкімдердің жалақысын арттыруға мораторий енгізу туралы» қаулы қабылданды. Бұл туралы ҚР премьер-министрінің сайты хабарлады.

Сонымен қатар, 1 ақпанда премьер-министр Әлихан Смайыловтың төрағалығымен өткен Үкімет отырысында «Жекешелендірудің 2021-2025 жылдарға арналған кейбір мәселелері туралы» қаулыға өзгерістер енгізілді.

«Құжат жекешелендіруге жататын мемлекеттік активтерді іріктеу критерийлерін бекітуді көздейді» делінген хабарламада.

Экономиканы жекешелендіру бөлігінде жаңғырту мәселелері жөніндегі мемлекеттік комиссияның шешімдері мемлекеттік мүлік және квазимемлекеттік сектор субъектілері тізілімінің веб-порталдарында жариялануға жатады.

Еске салсақ, 11 қаңтарда мемлекет басшысы Қасым-Жомарт Тоқаев министрлер, депутаттар мен әкімдердің жалақысын көтеруге бес жылға мораторий жариялаған болатын.