Әкімдіктегі жанжал: Атыраудағы Абай ескерткішінің тағдыры не болмақ?

Атырау облысының әкімі Махамбет Досмұхамбетов шенеуніктер сыбайлас жемқорлық жасады деген күдікке ілінген Абай ескерткішінің тағдыры туралы сұраққа жауап берді.

Еске салсақ, Сыбайлас жемқорлыққа қарсы қызмет Бақытгүл Хаменова мен Мәдениет, архивтер және құжаттама басқармасының басшысы Ақылбек Рысқалиевқа қатысты тергеу жүргізіп жатыр. Олар Атырауда 145 млн теңге сомасында Абай ескерткішін жасап, орнатуға мемлекеттік сатып алу шартын жасасқаны үшін ЖШС басшысынан 4,5 млн теңге пара алды деген күдікке ілінді.

Үкімет отырысында журналистер аймақ басшысынан ескерткіштің тағдырын сұрады.

«Ескерткіш туралы шешім, қателеспесем, 2016 жылы қабылданған. Пандемия кезінде жұмысты жүргізе алмадық, биыл ескерткіш орнату жоспарда бар еді. Уақыттың шегерілуі де, шегерілмеуі де мүмкін. Тергеу әсер ете ме, айта алмаймын» деді Махамбет Досмұхамбетов.

Дегенмен, ол ескерткіш орнату жұмыстары тоқтатылған жоқ деп сендірді.