Әкімдіктегі штат саны қысқарады: Мамин қол қойды

Қазақстан премьер-министрі Асқар Мамин 2021 жылғы 9 желтоқсанда мемлекеттік органдардағы штат санын қысқарту туралы №874-ші қаулыға қол қойды.

Қаулының мәтініне сәйкес, штат санының лимиттері министрліктерде, түрлі деңгейдегі әкімдіктерде өзгереді. Құжат мұндай лимиттерді «қызмет бабында пайдалану үшін» арнайы белгісімен белгілеуді ұйғарады.

«Орталық және жергілікті атқарушы органдар: 2022 жылғы 1 қаңтарға дейінгі мерзімде Қазақстан Республикасының заңнамасына сәйкес осы қаулыға 1 және 3 - қосымшаларда көрсетілген штат санының лимиттеріне сәйкес штат санын қысқарту жөнінде жұмыс жүргізсін; 2022 жылғы 1 қаңтардан бастап 2023 жылғы 1 қаңтарға дейінгі мерзімде Қазақстан Республикасының заңнамасына сәйкес осы қаулыға 2 және 4-қосымшаларда көрсетілген штат санының лимиттеріне сәйкес штат санын қысқарту жөнінде жұмыс жүргізсін» делінген қаулы мәтінінде.