Ким Чен Ын Путинге қауіп-қатерлерді жоюда ынтымақтастықта екенін айтты

Солтүстік Корея басшысы КХДР-дың Ресеймен стратегиялық және дәстүрлі достығы үнемі нығая түсетініне сенімді.

КХДР Мемлекеттік кеңесінің төрағасы Ким Чен Ын Жеңіс күнімен Ресей президенті Владимир Путинге жолдаған құттықтау жеделхатында «орыс халқының ісін» қолдайтынын мәлімдеді, деп хабарлайды Солтүстік Кореяның Орталық телеграф агенттігі.

 «Жеңістің өлмес дәстүрін жалғастыра отырып, саяси және әскери қауіптер мен жау күштердің бопсалауын түбегейлі жою және елдің абыройын, тыныштығы мен қауіпсіздігін қорғау үшін орыс халқының ісімен берік ынтымақтастығымды білдіремін. Екі ел арасындағы стратегиялық және дәстүрлі достық уақыт талабына және екі ел халықтарының түбегейлі мүдделеріне сәйкес үнемі нығайып, дами береді»  делінген Ким Чен Ынның жеделхатында.

Солтүстік Корея басшысы Ресей халқы Ұлы Отан соғысы жылдарында «теңдесі жоқ қаһармандық пен жанқиярлық рух көрсетті, әділдік үшін, фашизмді талқандау үшін соғыста ұлы жеңіске жетті, бұл барша адамзаттың болашағына қауіп төндірген болатын» деп атап өтті.