Киік атып, мүйізін сатқан екі қылмыстық топ ұсталды

Еліміздің Батыс өңірлерінде киіктерді заңсыз аулап, мүйіздерін сатумен айналысқан екі қылмыстық топ ұсталды.

 «ІІМ Криминалдық полиция департаменті Батыс Қазақстан облысының полицейлерімен бірлесіп, киіктерді заңсыз аулап, мүйіздерін сатумен айналысқан екі қылмыстық топты ұстады. Бұл топтардың 11 мүшесі қылмыстық жауапқа тартылады. Олар өткен жылдың қыркүйек айынан бері облыс аумағында браконьерлікпен айналысқан», - деді ресми өкіл министрлік ұйымдастырған брифингте.

Жауапқа тартылған қылмыскерлерді тергеу барысында 700-ден астам киік мүйізі, 9 атыс қаруы, 7 автокөлік, 2 қарда жүретін көлік және 2 мотоцикл тәркіленген. Ең сорақысы, жойылып кетуі қаупі жоғары киіктерді ату арқылы экологияға 700 млн теңгеден астам шығын әкелген.

«Аталған фактілер бойынша сотқа дейінгі тергеу амалдары жүріп жатыр. Айта кетейік, жыл басынан бері ішкі органдар табиғат қорғау заңнамасын бұзған 12,5 мың фактіні анықтады. Сотқа дейінгі 583 тергеу басталды, оның ішінде 221 қылмыстық іс сотқа жолданды. 12 мыңға жуық құқық бұзушы әкімшілік жауапқа тартылды», - деді Н. Ораз.