Киевте тағы бір қазақтың киіз үйі бой көтерді

Екінші және ең үлкен «мызғымас киіз үй» Киевте орнатылды. Бұл жолы да тұрғындарға палау, шәй, тәтті тағамдар ұсынылады.

Бұл Украинадағы ең үлкен киіз үй. Ол 63,5 шаршы метр аумақты алып жатыр. Львов, Одесса, Харьков және Черкассы қалаларында тағы төрт киіз үй тігілгені белгілі болады. Қазақстандық меценаттар мен еріктілер  осындай алты киіз үй орнатты. Бұл электр жарығы сөнген кезде украиндықтар үшін жылу пункті қызметін атқарады.

Киевтегі бұл  киіз үйді тігуге екі күнге жуық уақыт кетті.

Қала тұрғындарына қазанда пісірілген палау, бауырсақ, алма, тәттілер мен ыстық шай ұсынылды.

Киіз үйде үлкен пештің қасында жылынып, гаджеттерді зарядтауға болады. Мұның бәрі келушілер үшін тегін.

Қазақтың киіз үйлерін тігу бастамасын алғашында Украина Жоғарғы Радасының халық депутаты Сергей Ногорняк көтерген. Бұл идеяны қазақстандық бизнес пен қазақ диаспорасының өкілдері, сондай-ақ Бүкіл украиндық қайырымдылық қорының волонтерлері қолдады.

Еске салайық, 6 қаңтарда Киев облысында орналасқан Украинаның Буча қаласында қазақ диаспорасы мен еріктілер киіз үй түріндегі тегін «мызғымас баспана» ашқан болатын.

Киіз үйді орнату Ресей Сыртқы істер министрлігінде қатты резонанс тудырды. Ресей Сыртқы істер министрлігінің ресми өкілі Мария Захарованың түсініктемелерінен Қазақстан билігі Ресейді Бучадағы акцияға үкіметтің қатысы жоқ деп сендіргені байқалады. Бұл ретте ол Қазақстан үкіметінен ресми жауап күтіп отырғанын атап өтті.

11 қаңтарда Қазақстан Республикасы Сыртқы істер министрлігінің ресми өкілі Айбек Смадияров үкімет отырысында киіз үйді орнату жеке бастама екенін және Қазақстан Республикасының Сыртқы істер министрлігі бұдан ешқандай мәселе көрмейтінін атап өтті.