Киевте 16 қанатты киіз үй тігіледі

Украина астанасы Киевтегі Шевченко саябағында ең үлкен киіз үй тігіліп жатыр. Киіз үйдің ауданы 63,5 шаршы метрді құрайды.

Страна басылымы хабарлағандай, киіз үйдің тігілуіне қазақстандық кәсіпкерлер мен еріктілер мұрындық болған.

– Киевте Украинаның барлық қалаларының ішіндегі ең үлкен киіз үй болады, ол 16 қанаттан тұрады. Ресми ашылуы сенбі күні сағат 14.00-де өтеді, – деп хабарлады еріктілердің бірі.

Бұл Украинадағы екінші киіз үй. Еске салайық, бұған дейін Ресей Федерациясы Қазақстанды Украинада киіз үй орнатқаны үшін сынға алған еді. Ресей СІМ өкілі Мария Захарова Бучада киіз үй орнату Ресей мен Қазақстанның стратегиялық серіктестігіне зиян келтіретінін айтқан.

Ал Қазақстан СІМ Ресейге Қазақстанның Украинадағы Елшілігінің Бучада киіз үйге қатысы жоқ, бұл қазақстандық бизнесмен-меценаттардың жеке бастамасы екенін айтты.