Әкесі қызын бірнеше жыл бойы «білместіктен» зорлады

Оралда әкесі қызын зорлады. Педофил ұсталған кезде «әйеліммен шатастырып алдым» деп мәлімдеді.

Бұл туралы Orda.kz Астана телеарнасына сілтеме жасап хабарлады.

– Жыныстық қол сұғылмаушылық саласында 30%-ға өсім байқалды. Жақында біз кәмелетке толмағандарға қатысты қылмыстық істі тіркедік. Онда әкесі ұзақ уақыт бойы өз қызын зорлап келген. Ұсталған кезде «әйеліммен шатастырып алдым» деп мәлімдеді, - деді Орал қаласының ювеналды полиция бөлімінің аға инспекторы Мәдина Құспанова.

Осыған ұқсас тағы бір жағдай орын алған. Көп балалы отбасынан шыққан қыз екі жыл бойы өзінің шешесі мен өгей әкесі оны ұрып-соғып, қорлағанын айтты. Жасөспірім қорлыққа шыдамай, үйінен қашып кеткен. Полиция оны тапқан кезде, ол үйіне қайтқысы келмеген. Ол балалар үйіне өткізіп тастауды сұрады. Әйтпесе өзіне қол жұмсайтынын айтқан.

– Ол мені осылай ұрды. Анам «қаласаң өл» деп айтты. Шынымен өлгім келді. Бірақ өзіме қол жұмсай алмадым. Өлгім келсе де жылап, жылап қоятынмын, - деді жасөспірім қыз.

Бұл отбасын полиция қызметкерлері өз бақылауына алды.

Биыл Оралда кәмелетке толмағандар өтініш бере алатын психологиялық көмек қызметі ашылды.