Кеше Алматыда оқ атқан адам Ресей азаматы болып шықты

Алматыдағы тұрғын үй кешенінен оқ атқан адам Ресей азаматы болып шықты. Күдіктінің оқ-дәрілері бар қаруға меншік құқығы тергеу барысында анықталады.

Сондай-ақ, әлеуметтік желілерде оқ атқан адам туралы ақпарат пайда болды. Ондағы мәліметтер бойынша ол Ресей Федерациясының азаматы болып шықты. Аты-жөні - Р.А.Исаев, 1968 жылы туған.

Онда ол кісінің «соғыс ошақтарында» болған адам ретінде тіркелгені айтылады. Ендігі жерде Алматы қаласы полиция департаментінен ақпараттың расталуын немесе жоққа шығарылуын күтеміз.

Полиция мәліметінше, тұрғын үй кешенінің тұрғындары арасында зардап шеккендер жоқ. Оның бұл әрекетіне себеп болған жайт аталды. 

— Бұған дейін оның әйелі балаларын ертіп кетіп қалған. Ер азаматтың мұндай әрекетке баруының себебі осы болуы мүмкін, - деді Алматы қалалық ПД баспасөз хатшысы Салтанат Әзірбек. 

Істің басқа мән-жайлары мен қылмыстың жаңа фактілер анықталып жатыр.

Естеріңізге салсақ, кеше аталған күдікті Алматыдағы «Бұқар Жырау Тауэрс» тұрғын үй кешенінде күзетшіні атып, пәтерін полиция қызметкерлері қоршап алғаннан кейін  көп қабатты үйдің терезесінен секіріп кеткен болатын.