«Кепілге алынған» қазақстандықтар туралы ақпарат  расталмады

Қазақстан Республикасының Украинадағы елшісі «кепілге алынған» қазақстандықтар туралы ақпаратты растамады.

Қазақстанның Украинадағы елшісі Дархан Кәлетаев радикалдар кепілге алды деген қазақстандықтар туралы ақпаратқа қатысты Orda.kz тілшісіне пікір білдірді.

РФ Ұлттық қорғанысты басқару орталығының басшысы Михаил Мизинцев 7 наурызда өткен брифингте Украинада «радикалдар» 1634 шетелдікті тірі қалқан ретінде кепілде ұстап отырғанын айтты. Олардың ішінде Сумы қаласында сегіз, Мариупольде тағы 18 қазақстандық бар делінген. Сондай-ақ тізімде Иордания, Египет, Вьетнам, Индонезия, Үндістан, Қытай және Түркия азаматтары бар.

Кәлетаев Orda.kz тілшісіне оларда кепілге алынғандар туралы мәлімет жоқ екенін айтты.

 — Шынымен де, Мариупольде 18 адам бар, біз олармен байланыста болдық, бірақ қазір бұл қалада байланыс жоқ, жарық жоқ, телефондар жұмыс істемейді, біз оларға сағат сайын хабарласамыз, бірақ әзірге байланыс жоқ. Жасыл дәлізді күтіп отырмыз, ашылған бойда хабарласамыз. Бірақ, жалпы, Мариупольде адам көп, шетелдіктер көп, бәрі жасыл дәлізді күтіп отыр. Сумы қаласына  келсек, біздегі деректер бойынша екеуі шығып кетті, бес қазақстандық қалды, оның ішінде студент Денис те бар. Қазір жасыл дәлізді күтіп тұрған түріктер мен қытайлардың үлкен тобы бар, олар өз азаматтарын шығарады, біз олармен байланыстамыз, келіссөздер жүргізіп жатырмыз және адамдарымызды Полтаваға жүретін автобустарға отырғызуға тырысамыз. Бірақ бұл ақпарат (кепілге алынғандар туралы) қайдан шыққанын білмеймін, - деп түйіндеді елші.

Orda.kz тілшісі ҚР Сыртқы істер министрлігінен ақпарат сұрады.

Еске салайық, Қазақстан Украинадан өз азаматтарын эвакуациялауда. Қазақстандықтарды автобуспен Львовқа, одан Польшаға, ал ол жерден арнайы рейспен туған жеріне жеткізді. 28 ақпанда осындай алғашқы ұшақ Алматыға қонды. Екінші рейс 1 наурызда орындалды. 4 наурызда Нұр-Сұлтан әуежайына үшінші репатриациялық рейс қонды.