Кентаудағы қыздар төбелесі: облыстық ПД пікір білдірді

17 желтоқсан күні Түркістан облысы Кентау қаласының полиция бөлімшесіне қала тұрғыны өзінің қызы жанжал кезінде жарақат алды деп шағымданған. Қыздар арасындағы төбелес видеосы желіде тарады.

Түркістан облыстық полиция департаменті аталған оқиғаға байланысты пікір білдірді.

«Белгілі болғандай бірнеше мектептің жоғары сынып оқушылары мектеп ауласында өзара жанжалдасқан. Нәтижесінде кәмелетке толмаған қыз дене жарақатын алып, ауруханаға орналастырылған. Бұл оқиға бойынша полиция қызметкерлері мен мектеп әкімшілігі жанжалдасқан қыздардың ата-аналарымен кездесіп, 17.12.2021 жылы хаттама түзілген. Құқық бұзған жасөспірімдердің ата-аналарының жауапкершіліктерін қарау мақсатында, ҚР ӘҚБтК-нің 435-бабы бойынша құжаттар жинақталуда» делінген ПД жариялаған мәтінде.

Жасөспірім қыз дәрігердің рұқсатымен ауруханадан шыққан соң, құжаттар сараптамаға жолданады. Сарапшылардың қорытындысымен заңды шешім қабылданатын болады. Бүгінгі таңда осы іспен айналысып жатқан Кентау ҚПБ ювеналды полиция тобының учаскелік полиция инспекторы оқушы қыздың анасына жолығып, атқарылып жатқан жұмыстардан хабардар еткен.