Кентау қаласының дәрігері Ashyq жобасы үшін пара алды деген күдікке ілінді

Кентау қаласы санитарлық-эпидемиологиялық бақылау бөлімінің бас маманы Ashyq бағдарламасына қосылу үшін кәсіпкерлерден пара алды деп күдіктелуде.

Бұл туралы Orda.kz Сыбайлас жемқорлыққа қарсы қызметке сілтеме жасап хабарлады.

Қазіргі уақытта Сыбайлас жемқорлыққа қарсы қызмет Кентау қалалық СЭБ басқармасы бөлімінің бас маманына қатысты сотқа дейінгі тергеу жүргізуде.

– Көрсетілген лауазымды тұлға мемлекет коронавирус инфекциясының таралуын тежеу ​​бойынша қабылдаған шараларға қарамастан, кәсіпкерлерден 100-120 мың теңге пара жүйелі түрде алған. Ол кәсіпкерлерге Ashyq қосымшасын енгізу үшін оң санитарлық-эпидемиологиялық қорытынды берген, - делінген хабарламада.

Күдікті ҚР Қылмыстық іс жүргізу кодексінің 28-бабына сәйкес ұсталып, Түркістан қаласының уақытша ұстау изоляторына қамалды. Күдікті кінәсінің дәрежесін анықтайтын соңғы үкімді сот шығарады.