Кеншілерден ақша бопсалайтын қылмыстық топ ұсталды

Қарағанды облысының полицейлері ҰҚК департаменті қызметкерлерімен бірлесіп, Qarmet АҚ-ның жұмыскерлері мен Абай қаласы тұрғындарын бопсалаған қылмыстық топты құрықтаудың екінші кезеңін өткізді, деп хабарлайды Orda.kz порталы Polisia.kz-ке сілтеме жасай отырып.

Еске сала кетейік,  кеше ІІМ өткен жылдың желтоқсан айында Qarmet кеншілерін бопсалаған қылмыстық топты ұстағаны туралы хабарлаған. Сол кезде қылмыстық топтың 7 мүшесі қамауға алынды.

Бірнеше қылмыстық істі тергеу барысында ұсталғандарға қатысты ұйымдасқан қылмыстық топ құру, оған басшылық жасау және қатысу бойынша сотқа дейінгі тергеу жүргізілді. Тергеу кезінде 55 млн өзге де бопсалау деректері анықталды.

Сондай-ақ олардың «Қазақстан Темір Жолы» АҚ нысандарынан тауар-материал ұрлау дерегіне қатысы бары болғаны анықталды. Осыған орай осы жылдың 13 ақпанында ПД-ның ұйымдасқан қылмысқа қарсы күрес басқармасының және ҰҚК департаментінің жедел уәкілдері аталған қылмыстарға қатысы бар тағы да 8 адамды ұстады.

Полиция қызметкерлері 25 тінту жұмысын жүргізіді. Тінту барысында тіркелмеген атыс және суық қару, оқ-дәрілер және діни кітаптар тәркіленді. Олардың осыған ұқсас басқа да қылмысқа қатысы тексеріліп жатыр.

ІІМ-нің аталған бағыттағы жұмыстар жіті бақылауында.