Кенесары ханның мүсіні қызу талқыға түсті

Шығыс Қазақстан облысы, Жарма ауданы, Жаңғызтөбе ауылында халықтың бастамасымен Кенесары Ханның ескерткіші бой көтерді. Соңғы ханның мүсініне біреулер сүйсініп қарап жатса, енді бірі тас туындыдан қате тауып, дұрыс жасалмағанын айтуда.

Кейбір оқырмандар «Кенесарыны тым талтайтып» жіберген десе, енді бірі «бас киімін теріс кигізген, хандар мұрағын бұлай кимеген» деген уәж айтты.

Десе де, көпшілік ауыл азаматтарының бұл ісін құп көріп, ризашылығын білдіріп жатты. Мұндай сұсты, рухты ескерткіштер көкпен таласып, елдің бас қалаларында тұруы керек деген ұсыныстар да айтылды. Халықтың осылай өз бастамасымен ұлт тұлғасын тұғырға қондыруын рухани қажеттіліктен туып отыр деп бағаладық. Жоғын - жоқтау деп түсіндік. Қарапайым ауылда қойылған тас мүсін халықты бір сәт рухтандырып, әлеуметтік желілерде қызу талқыланып, тақырып жандана түсті. Ал Кунсткамерада жатқан Ханның басы қайтарылса не болар екен?! Ол күннің де жақындап қалғанынан үміттіміз. Ол кезде қазақ халқының рухы асқақтай түсері даусыз.